Amo 6 | ZomZIV | STEP | Zion a nuam a sa hithiatte, Samaria Vum a lungmuanga omte minamte ulianpente, Israel paikhiatnate, gimna nak thuak na nucia!

Amos 6

Minuamsate Tungah Gimna

1 Zion a nuam a sa hithiatte,
Samaria Vum a lungmuanga omte
minamte ulianpente,
Israel paikhiatnate, gimna nak thuak na nucia! ^a
2 Calneh ah pai-in va en dih un;
tua pan Hamath ah va pai un ^b
tua khitteh Philistia-a Gath dong paisuk un. ^c
Tua kumpi-gamte sangin note hoihzaw na hi uh hiam? ^d
Amau leitang no aa sangin zazaw ahi hiam?
3 Gitlohna ni tawh kipelh na sawm uh a,
lauhuaina mun kitun na suak zawsop uh hi. ^e
4 Saiha lupna tungah lumin tutna zaal ah
na kingam hithiat uh hi.
Tuuno sa le keelno vakthau sa
duh zawkzawk na ne uh hi. ^f
5 David bangin na harp-te uh na ututun na tum uh a, ^g
tumtheihte na bawltawm uh hi. ^h
6 Hai lianpipi dimin zu na dawn uh a,
nilhthau hoihpente in na kizut uh hi.
Tua hi napi Joseph-te siatna hangin na dah kei uh hi.
7 Tua ahi manin note sala kikai masate lakah na kihel ding uh hi.
Na pawibawlna uh le na kingap hithiatna uh a bei ding hi. ⁱ

Israel-te Kiphatsakna TOPA in Kih

8 Thupipen TOPA amahmah kiciam khin a - TOPA Thahatpen Pasian in genkhia hi: ^j

“Jacob kiphatsakna ka kih a,
a kulh muanhuaite uh ka hua hi;
khuapi le a sunga om na teng ^k
ka hukhia ding hi,” ^l

9 Inn khat sungah mi sawm a hin lai leh amaute zong a si ding uh hi. 10 Siluang hal dingin a behte un a puakkhiat uh leh tua lai-ah a bu khatpeuh a om hiam?” ci-in dong ding uh a, “No tawh khatpeuh a om lai hiam? “a kicih a, “Om kei” a kicih leh tua ciangin amah in, “Pau kei ou! TOPA min lo kha nawn kei ni,” ci ding hi. ^m

11 Ahang in, TOPA in thu pia khin a,
amah in inn liante sukhamin ⁿ
inn neute a sunen ding hi. ^o
12 Sakolte suangkawl lakah tai ahi hiam?
Kua in tuate lak bawng tawh kho ahi hiam?
Ahi hangin note in thutang, gu na suaksak uh a, ^p
thumaan gah, thukhaa na suaksak uh hi. ^q
13 Lo Debar ^{▼▼6.13 Lo Debar pen bangmah lo cihna} la zo in note na lungnuam uh a,
“Eima thahatna tawh Karnaim ^{▼▼6.13 Karnaim pen kite cihna; hih munah ki pen thahatna lim.} la hi lo i hi hiam?” na ci uh hi. ^t
14 Ahang in, TOPA Thahatpen Pasian in,
“Israel innkuante aw, note do dingin minam khat ka khangsak dinga, ^u
tua in Lebo ^{▼▼6.14 Ahikeh Alutna panin} Hamath pan Arabah kuam dong lamdung tawnah
hong nengcip ding hi,” a ci hi.